2011-ம் ஆண்டு வெளியான ‘தெய்வ திருமகள்’ திரைப்படத்தில் நிலா என்ற குழந்தை கதாபாத்திரத்தில் நடித்து அனைவரின் மனதையும் கவர்ந்தவர் சாரா. அதன்பின், விஜய் இயக்கத்தில் வெளியான ‘சைவம்’ படத்திலும் சிறப்பாக நடித்தார். மேலும், மணிரத்னத்தின் ‘பொன்னியின் செல்வன் 2’ படத்தில் இளம் வயது நந்தினி கதாபாத்திரத்தில் நடித்து ரசிகர்களின் பாராட்டை பெற்றார்.
தற்போது சாரா ‘மேஜிக்’ என்ற புதிய படத்தில் முக்கிய கதாபாத்திரத்தில் நடித்து வருகிறார். பிரபல தயாரிப்பு நிறுவனமான சித்தாரா என்டர்டெயின்மென்ட் தயாரிக்கும் இப்படத்தை, நானியின் ‘ஜெர்சி’ மற்றும் விஜய் தேவரகொண்டாவின் ‘கிங்டம்’ பட இயக்குநர் கவுதம் தின்னனுரி எழுதி இயக்குகிறார்.
இந்த திரைப்படத்திற்கு இசையமைப்பாளர் அனிருத் இசையமைக்கிறார். அண்மையில், இப்படத்தின் முதல் பாடல் வெளியிடப்பட்டது. ‘டோண்ட் நோ வை’ என்ற இந்த பாடலை அனிருத் அதிகாரப்பூர்வமாக வெளியிட்டுள்ளார்.
சாராவின் ‘மேஜிக்’ படம் ரசிகர்களிடம் அதிக எதிர்பார்ப்பை ஏற்படுத்தியுள்ளது. சிறுவயதில் இருந்து நடிப்பில் அசத்திய அவர், தற்போது புதிய கதாபாத்திரத்தில் நடித்திருப்பது ரசிகர்களுக்கு ஆவலாக இருக்கிறது. மேலும், கவுதம் தின்னனுரியின் தன்னிச்சையான கதைகள் மற்றும் அனிருத் இசை இப்படத்தின் வெற்றிக்கு துணைபுரியும் என்று எதிர்பார்க்கப்படுகிறது.
