கோலா லாங்காட், ஏப்ரல் 4: அங்காத்தான் மூடா கெஅடிலான் (AMK) கோலா லாங்காட் 2025-2028 தலைவர் பதவிக்கு போட்டியிடத் தயாராக இருப்பதாக யோகபாரதி ராஜேந்திரன் அறிவித்துள்ளார். இளம் தலைமுறையின் உரிமைகள், சமூக நலன், மற்றும் பெண்களின் அரசியல் பங்கேற்பை உறுதிப்படுத்தும் உறுதியுடன், இந்த பதவிக்கு முன்மொழியப்பட்டுள்ளார்.
சுகாதாரம், தொழில் முனைவு, மற்றும் சமூக சேவையில் பரந்த அனுபவம் கொண்ட யோகபாரதி, AMK கோலா லாங்காட் இளைஞர்களின் தலைமைத்துவ திறன்களை மேம்படுத்துவதற்கும், சமூக நலத்துடன் கூடிய முன்னேற்றத்துக்கான நடவடிக்கைகளை மேற்கொள்வதற்கும் முழுமையாக அர்ப்பணிக்கப்படுவதாக தெரிவித்துள்ளார்.
2022-2024 காலகட்டத்தில் AMK சிலாங்கூர் இளமகளிர் பிரிவு தலைவராகவும், 2024-2025 நலத்துறை தலைவராகவும் பணியாற்றியுள்ள அவர், இளம் பெண்கள் மற்றும் இளைஞர்களின் முக்கிய தேவைகள் மற்றும் சவால்களை ஆழமாக புரிந்துள்ளார்.
மேலும், சமூக சேவையில் தனது அர்ப்பணிப்பை வலியுறுத்தும் வகையில், அவர் மெஸ்ரா மாஜு நல அமைப்புகளையும், பெலியா சிலாங்கூர் இயக்கத்தையும் முன்னின்று வழிநடத்தி வருகிறார். இது, இளைஞர்களின் உரிமைகளை உறுதி செய்யும் அவரது உறுதிப்பாட்டை பிரதிபலிக்கிறது.
“இது மாற்றத்திற்கான நேரம். அனைவருக்கும் சமத்துவ நியாயத்தை உறுதி செய்ய, இளைய தலைமுறையின் குரலை மேலும் உயர்த்துவோம்,” என அவர் வலியுறுத்தினார்.
-வீரா இளங்கோவன்
