கோலாலம்பூர், 11 மார்ச் — மதம் அல்லது இன வெறியை தூண்டுபவர்கள் மீது கடுமையான சட்ட நடவடிக்கை எடுக்கப்பட வேண்டும் என்று அமைச்சர் கோபிந்த் சிங் மீண்டும் வலியுறுத்தினார்.
“பிற மதங்களை அவமதிப்பது ஏற்றுக்கொள்ள முடியாதது. அதனை செய்தவர்களுக்கு கட்டாயமாக தக்க அழுத்தமான நடவடிக்கை எடுக்கப்பட வேண்டும். இது போன்ற செயல்கள் மீண்டும் நடைபெறாமல் தடுப்பதற்கும் மற்றவர்களுக்கு ஒரு நெடுவழி போதமாக இருக்கவும், அரசு உறுதியான நிலைப்பாடு எடுத்திருக்க வேண்டும்,” என்று அவர் தனது அறிக்கையில் தெரிவித்தார்.
இது தொடர்பாக கடந்த வெள்ளிக்கிழமை (மார்ச் 7, 2025) அமைச்சரவையில் இந்த விவகாரம் விவாதிக்கப்பட்டதாகவும், இவ்வாறான நிகழ்வுகளை கடுமையாகக் கட்டுப்படுத்த வேண்டுமென்று உறுதியான முடிவு எட்டப்பட்டதாகவும் அவர் குறிப்பிட்டார்.
அதே நாளில், தகவல் தொடர்பு அமைச்சர் டத்தோ பாஹ்மி பட்சில் இது தொடர்பாக ஒரு அதிகாரப்பூர்வ அறிக்கையை வெளியிட்டார். இது இந்த விவகாரத்தின் தீவிரத்தையும், அவசரத்தையும் உணர்த்துகிறது.
காவல்துறையில் இதுவரை பல புகார்கள் பதிவு செய்யப்பட்டுள்ளன, மேலும் பல நபர்களிடம் இருந்து வாக்குமூலங்கள் பெறப்பட்டுள்ளன. ஆனால், சிலர் திட்டமிட்டு இந்த சர்ச்சையை மீண்டும் எழுப்புவதும், சமூகத்தில் குழப்பத்தை ஏற்படுத்துவதும் கவலைக்குரியதாக உள்ளது.
“இவ்வாறான சூழ்நிலையில் காவல்துறை விரைவாகக் கருத்துக் கொண்டு நடவடிக்கை எடுக்க வேண்டும். மதங்களை அவமதிக்கும் பதிவுகள் மற்றும் அறிக்கைகள் வெளியிடுபவர்கள் தண்டிக்கப்படாமல் இருப்பதை சகிக்க முடியாது. அவர்கள் மீது உடனடி சட்ட நடவடிக்கை எடுக்கப்பட வேண்டும்,” என்று அமைச்சர் கூறினார்.
“இத்தகைய பிரச்சனைகளை தடுக்க சட்டங்கள் இருக்கின்றன. அவை கடுமையாக அமல்படுத்தப்பட வேண்டும், இல்லையெனில் அவை அர்த்தமற்றவையாகிவிடும்,” என கோபிந்த் சிங் வலியுறுத்தினார்.
-கவியரசி கிருஷ்ணன்
