கோலாலம்பூர், 7 நவ. – காதல் தொடர்பான சந்தேகத்தின் காரணமாக ஒரு பெண்ணின் கார் ஜன்னலை உடைத்த இளைஞன் போலீசாரால் கைது செய்யப்பட்டார். இந்த சம்பவம் ஜொகூர் மாநிலம் குளு அங் பகுதியில் நடந்ததாக தெரிவிக்கப்பட்டுள்ளது.
குளு அங் மாவட்ட போலீஸ் தலைவர் டிஎஸ்பி எஸ். ஆறின் கூறியதாவது, 26 வயதான அந்த நபர், தனது காதலியாக நம்பிய பெண் ஒருவரை வேறு ஆணுடன் இருப்பதாக சந்தேகித்து கோபத்தின் உச்சத்தில் அவளது காரை தாக்கியதாக கூறினார்.
இந்த சம்பவம் நவம்பர் 5ஆம் தேதி இரவு 11.30 மணியளவில் நடந்தது. பெண் தனது காரை ஒரு வீட்டு முன்பாக நிறுத்தியிருந்தபோது, குற்றச்சாட்டுக்கு உள்ளான நபர் வந்து கார் ஜன்னலை கல்லால் உடைத்து விட்டதாக போலீஸ் விசாரணையில் தெரியவந்துள்ளது.
பாதிக்கப்பட்ட பெண் உடனடியாக போலீசில் புகார் அளித்ததைத் தொடர்ந்து, போலீசார் நவம்பர் 6ஆம் தேதி மாலை 4 மணியளவில் சந்தேக நபரை கைது செய்தனர். அவரிடம் மேற்கொள்ளப்பட்ட போதைப்பொருள் பரிசோதனையில் நேர்மறை முடிவு கிடைத்ததாகவும் போலீஸ் தெரிவித்துள்ளது.
இச்சம்பவம் குறித்த விசாரணை குற்றவியல் சட்டம் பிரிவு 427 (சொத்து சேதப்படுத்தல்) மற்றும் 506 (அச்சுறுத்தல்) கீழ் மேற்கொள்ளப்படுகிறது. குற்றம் நிரூபிக்கப்பட்டால் அதிகபட்சம் இரண்டு ஆண்டுகள் சிறை தண்டனை அல்லது அபராதம் அல்லது இரண்டிலும் தண்டனை விதிக்கப்படலாம்.
போலீசார் இதுபோன்ற உணர்ச்சி சார்ந்த பிரச்சினைகளுக்கு வன்முறை வழியைத் தேர்வு செய்வது குற்றமாகும் என்றும், உறவுகளில் பிரச்சினை ஏற்பட்டால் உரையாடல் மற்றும் சட்ட வழியே தீர்வு காணுமாறு பொதுமக்களை அறிவுறுத்தியுள்ளனர்.
-யாழினி வீரா
