சுபாங் ஜெயா, 6 ஏப்ரல்: புத்ரா ஹைட்ஸில் ஏப்ரல் 1ஆம் தேதி நிகழ்ந்த பெரும் எரிவாயு வெடிப்பு சம்பவம் தொடர்பாக இன்று மதியம் 12 மணி நிலவரப்படி மொத்தமாக 642 போலீசில் புகார்கள் பெறப்பட்டுள்ளதாக செலாங்கோர் போலீஸ் தலைவர் டத்தோ ஹுசைன் ஓமர் கான் தெரிவித்தார்.
இதுவரை 118 பேர் வரை விசாரணைக்காக அழைக்கப்பட்டு அவர்கள் வாக்குமூலம் பதிவு செய்யப்பட்டுள்ளது. இதில் 15 பேர் சம்பந்தப்பட்ட ஒப்பந்ததாரர்களும் உள்ளனர். மேலும், மார்ச் 31ஆம் தேதி இரவு ஒருவர் பட்டாசு வெடிக்கச் செய்ததாகவும் தனிப்பட்ட புகாரும் பெறப்பட்டுள்ளது.
வெடிப்பு ஏற்பட்ட இடம் மிகவும் அசாதாரண நிலைமையில் இருப்பதால், தொழிற்சாலை பாதுகாப்புத் துறை (DOSH) மற்றும் சுகாதாரத் துறை அதிகாரிகளால் விசாரணை தொடங்க முடியவில்லை. இடம் நிலைமையை நிலைப்படுத்தும் கட்டத்தில் உள்ளது; மேலும் மழையால் அது நீரில் மூழ்கியுள்ளது.
போலீசார் சாலை வெட்டும் பணிகளில் பயன்படுத்தப்பட்ட கழிவுநீர் குழாய்கள் 2.1 மீட்டர் ஆழத்தில் பதிக்கப்பட்டதாகவும், பெட்ரோனாஸ் எரிவாயு குழாய் 5.6 மீட்டர் ஆழத்தில் இருப்பதாகவும் தெரிவித்தனர்.
பிரச்சனையான இடத்தில் குழாய்களுக்கு இடையிலான இடைவெளி 1.6 மீட்டராக இருந்தாலும், எரிவாயு குழாயில் பாதிப்பு காணப்படவில்லை என போலீசார் உறுதி செய்துள்ளனர்.
-யாழினி வீரா
