பெட்டாலிங் ஜெயா, 31 மார்ச்: நோன்பு பெருநாள் வாழ்த்துச் செய்தியில், மாட்சிமை தங்கிய பேரரசர் சுல்தான் இப்ராஹிம் சுல்தான் இஸ்கண்டார், ஒற்றுமையை ஊக்குவிக்கவும், மக்களுக்கிடையே உறவை பரப்பவும் அனைத்து மலேசியர்களும் செயலில் ஈடுபட வேண்டும் என்று கேட்டுக்கொண்டார்.
ஒற்றுமையே நாட்டின் வளமும் நலனும் அடிப்படை என தெரிவித்த மன்னர், சமூகத்தினுள் பிளவை ஏற்படுத்தும் எந்தவொரு முயற்சியையும் சகிக்கக்கூடாது என்றும் வலியுறுத்தினார். “உண்மையான ஒற்றுமை மற்றும் ஒருமைப்பாட்டை நெறிமுறையான முறையில் உருவாக்க, பிளவை உருவாக்கக்கூடிய எந்த விதமான காரணிகளையும் ஒழிக்கும் முயற்சிகள் தீவிரமாக மேற்கொள்ள வேண்டும்,” என்று அவர் தனது வாழ்த்து உரையில் தெரிவித்தார்.
மலேசியர்கள் ஒற்றுமையை நிலைநாட்டுவது தொடர்ச்சியான செயலாக இருக்க வேண்டும் என்றும், ஒற்றுமை என்பது குழந்தைகளிலிருந்து மக்களுக்குள் வளர்க்கப்படவேண்டிய ஒரு பணியாகும் என்றும் மன்னர் சுட்டிக்காட்டினார். “நம்முடைய ஒற்றுமை மேற்பரப்பில் மட்டும் இல்லாமல், அதனை ஆழமானதாகவும் மாற்ற வேண்டும். சில சமயங்களில் அறியாமையால் அல்லது குற்றமில்லாமல் சிலரின் உணர்வுகள் பாதிக்கப்படலாம். அவ்வாறு ஏற்பட்ட சூழ்நிலைகளை நுட்பமாக சமாளிக்க ஒருமைப்பாடு அவசியம்,” என்றார்.
அதேபோல், ஒற்றுமையை பேணுவதும், வளர்ப்பதும், எதிர்கால சந்ததியினருக்கு அப்படியே மாற்றியளிப்பதும் ஒவ்வொரு மலேசியரின் பொறுப்பாக இருக்க வேண்டும் என்று மன்னர் தெரிவித்துள்ளார். “மதம், இனவெறியில்லாமல், ஒவ்வொருவரும் ஒற்றுமையை காப்பதற்கான பொறுப்பை ஏற்க வேண்டும். மலேசியாவின் அடிப்படைக் கொள்கையான ‘ருகுன் நெகாரா’ யின் ஐந்து தத்துவங்களின் அடிப்படையில் ஒற்றுமை வலுப்பெற வேண்டும்,” என்றார்.
மாட்சிமை தங்கிய பேரரசர் சுல்தான் இப்ராஹிம் சுல்தான் இஸ்கண்டார், பேரரசியார் ராஜா ஸரித் சோஃபியா தம்பதியர், அனைத்து மலேசியர்களுக்கும் நோன்பு பெருநாள் வாழ்த்துகளை தெரிவித்தனர். “இந்த புனித நாளில் கடமையில் இருப்பவர்களின் சேவைகளும் தியாகங்களும் பாராட்டத்தக்கது. உங்கள் விடாமுயற்சிக்கு இறையாசிர்வாதம் கிடைக்கட்டும்,” என்று பேரரசர் கூறினார்.
-யாழினி வீரா
