நேபிடாவ், ஏப்ரல் 3: மியான்மர் சாகைங் மாவட்டத்தில் நிலநடுக்கத்தால் பாதிக்கப்பட்டவர்களை தேடும் மற்றும் மீட்பு (SAR) பணியில் ஈடுபட்டுள்ள மலேசிய சிறப்பு தேடுதல் மற்றும் மீட்பு குழு (SMART) இதுவரை மொத்தம் எட்டு பேரை மீட்டுள்ளது.
தேசிய பேரழிவு மேலாண்மை முகமை (NADMA) வெளியிட்ட அறிக்கையில், இன்று முக்கிய கவனம் பள்ளி இடிபாடுகளில் சிக்கியவர்களை மீட்பது என தெரிவிக்கப்பட்டுள்ளது. இடிபாடுகளின் சிக்கலான தன்மையை கருத்தில் கொண்டு, LEMA (உள்நாட்டு பேரழிவு மேலாண்மை ஆணையம்) MAS-01 குழுவிற்கு பணிப் பகுதிகளை ஒதுக்கியது.
மீட்கப்பட்டவர்களில் மூன்று ஆண்கள், மூன்று பெண்கள், ஒரு குழந்தை உயிரிழந்த நிலையில் கண்டுபிடிக்கப்பட்டனர், ஒருவர் உயிருடன் மீட்கப்பட்டார். SAR பணியில் உள்நாட்டு மீட்புக் குழுவுடன் இணைந்து பணிகள் மேற்கொள்ளப்பட்டு வருகின்றன.
NADMA-வின் தகவலின்படி, மலேசிய மீட்பு குழுவின் 50 அதிகாரிகள் மற்றும் பணியாளர்கள் அனைவரும் நலமாக உள்ளனர், ஆனால் சிலர் கடுமையான வெப்பத்தால் ஏற்படும் கொஞ்சம் தொண்டை கரகரப்பு போன்ற பாதிப்புகளை அனுபவிக்கின்றனர்.
கடந்த வெள்ளிக்கிழமை, ரிக்டர் அளவில் 7.7 பூகம்பம் மியான்மரை தாக்கியது, இதில் மாண்டலே, பாகோ, மக்வே, வடகிழக்கு ஷான் மாநிலம், சாகைங் மற்றும் நேபிடாவ் அதிக சேதமடைந்த பகுதிகளாகும். SMART குழுவினர் மலேசிய அரசுவான்படையின் இரண்டு A400M விமானங்களில் நேபிடாவ் சர்வதேச விமான நிலையத்தில் பாதுகாப்பாக தரையிறங்கிய பின்னர், சாகைங் மாவட்டத்திற்கு 270 கிலோமீட்டர் சாலை மார்க்கமாக பயணம் செய்து மீட்பு பணிகளை தொடங்கினர்.
-யாழினி வீரா
