கோலாலம்பூர், அக். 19 –
அனைத்து கொள்கைகளையும் இன அடிப்படையில் பார்ப்பது அரசியலுக்கே தீங்கு என பிரதமர் டத்தோஸ்ரீ அன்வார் இப்ராஹிம் வலியுறுத்தினார். அரசாங்கத்தின் முயற்சிகள் பல நேரங்களில் தவறாக புரிந்துகொள்ளப்படாமல் இருக்க அவற்றை தெளிவுபடுத்த வேண்டிய கட்டாயம் உருவாகிறது என்றார் அவர்.
“எல்லாரும் தங்கள் இனத்தை மட்டுமே முன்னிலைப்படுத்த விரும்புகிறார்கள்; ஆனால் நான் அந்த அணுகுமுறையோடு ஒருபோதும் உடன்படவில்லை. நாம் அமைதியாக இருந்தால், எதையும் செய்யவில்லை என்று சிலர் குற்றம் சொல்கிறார்கள். ஆனால் நாங்கள் செய்கிறோம் — அதையும் சொல்ல வேண்டிய அவசியம் இருக்கிறது,” என அன்வார் உரையாற்றினார்.
தேசிய அளவிலான மடானி தீபாவளி 2025 திறந்த இல்ல நிகழ்வில் அவர் பேசினார். விழாவில் இலக்கியவியல் அமைச்சர் கோபிந்த் சிங் தியோ மற்றும் தொழில்முனைவோர் மேம்பாட்டு துணை அமைச்சர் டத்தோஸ்ரீ ஆர். ரமணன் ஆகியோரும் கலந்து கொண்டனர்.
அரசாங்கம் சில சமூகங்களுக்கு உதவவில்லை என்ற குற்றச்சாட்டை அவர் கடுமையாக நிராகரித்தார். “அடிப்படை நலத்திட்டங்கள் — எஸ்டிஆர் (STR), சாரா (SARA) போன்றவை — இந்திய சமூகத்திற்கே 1 பில்லியன் ரிங்கிட்டுக்கும் மேல் நன்மை செய்துள்ளன,” என குறிப்பிட்டார்.
அவர் மேலும் கூறியதாவது, “இந்தத் திட்டங்கள் இன வேறுபாடுகளின் அடிப்படையில் அல்ல, தேவைப்படுபவர்களுக்கு உதவுவதே நோக்கம். நாங்கள் எதையும் செய்யவில்லை என்று சொல்லாதீர்கள் — நாங்கள் செய்தது, இப்போது சத்தமிட்டு பேசிக்கொண்டிருக்கும் பெர்சத்து அல்லது பாஸ் இதுவரை செய்ததை விட பெரிது,” என்றார் பிரதமர்.
அவர் முடிவில், மடானி அரசு ஒற்றுமை, சமநிலை, சம வாய்ப்பு ஆகிய மதிப்புகளை முன்னிலைப்படுத்தும் உறுதியுடன் செயல்பட்டு வருவதாகவும், தீபாவளி போன்ற திருநாள்கள் அந்த ஒற்றுமையின் ஒளியை வெளிப்படுத்தும் தருணங்கள் எனவும் கூறினார்.
-யாழினி வீரா
