கோலாலம்பூர், 25 செப். – சராவாக்கில் இவ்வாண்டு பதிவு செய்யப்பட்ட வணிக குற்றங்கள் கடந்த ஆண்டுடன் ஒப்பிடுகையில் 57.67 சதவீதம் அதிகரித்துள்ளதாக சராவாக் காவல் துறைத் தலைவர் டத்தோ மொஹமட் அசாத் சாஃபார் மான்சா தெரிவித்துள்ளார்.
2024 ஜனவரி முதல் ஆகஸ்ட் வரை 1,570 வழக்குகள் பதிவு செய்யப்பட்ட நிலையில், 2025 அதேகாலப்பகுதியில் 2,475 வழக்குகள் பதிவாகியுள்ளன. இது வணிக குற்றச் செயல்கள் பெரிதும் உயரும் அபாயத்தைக் காட்டுவதாக அவர் கூறினார்.
இந்த வழக்குகளில் பெரும்பான்மையானவை ஆன்லைன் மோசடிகள், முதலீட்டு ஏமாற்றுகள், காதல் சதி, பிஷிங், போலி கடன், விற்பனை மோசடி போன்றவற்றாக உள்ளன. இவற்றின் மூலம் குற்றவாளிகள் பொதுமக்களிடமிருந்து கோடிக்கணக்கான ரிங்கிட்களை அபகரித்துள்ளனர்.
போலீசார் தொடர்ந்து கண்காணிப்பு மற்றும் விசாரணைகளை தீவிரப்படுத்தி வருவதாகவும், பொதுமக்கள் மோசடித் தளங்கள் அல்லது சந்தேகத்துக்கிடமான சலுகைகளில் ஈடுபடாமல் எச்சரிக்கையாக இருக்க வேண்டும் என்றும் அவர் வலியுறுத்தினார்.
மேலும், மக்கள் நிதி பரிவர்த்தனைகளை மேற்கொள்ளும் போது அதிகாரப்பூர்வ தளங்கள் மற்றும் சரிபார்க்கப்பட்ட வங்கிக் கணக்குகளை மட்டுமே பயன்படுத்த வேண்டும் என்றும், ஏதேனும் சந்தேகமான தகவல் கிடைத்தால் உடனடியாக CCID Scam Response Centre-க்கு புகார் செய்ய வேண்டும் என்றும் அறிவுறுத்தினார்.
சராவாக்கு காவல்துறை, குற்றத் தடுப்பு நடவடிக்கைகளில் சமூகத்தின் ஒத்துழைப்பை வலியுறுத்தி, விழிப்புணர்வு பிரச்சாரங்களை அதிகரிக்கும் திட்டத்தையும் அறிவித்துள்ளது.
-யாழினி வீரா
