பினாங்கு, 25 அக். – ஜுரு பகுதியில் நடந்த இரத்த குளிரவைக்கும் கொலைச் சம்பவம் மாநிலம் முழுவதும் அதிர்ச்சியை ஏற்படுத்தியுள்ளது. 51 வயதான ஒரு பெண்ணும், 11 வயதான அவரது மகளும் வீட்டிற்குள் படுகொலை செய்யப்பட்ட நிலையில் கண்டெடுக்கப்பட்டனர்.
சம்பவம் வெளிவந்த உடனே, பினாங்கு மாநில போலீஸ் விசாரணைத் துறையினர் மூன்று நேபாள நாட்டைச் சேர்ந்த ஆண்களை கைது செய்தனர். இவர்கள் மூவரும் 30 முதல் 40 வயதுக்குள் இருப்பவர்கள் என கூறப்படுகிறது. நீதிமன்ற உத்தரவின்படி, சந்தேகநபர்கள் ஏழு நாட்களுக்கு ரிமானில் வைக்கப்பட்டுள்ளனர்.
மாநில போலீஸ் தலைவர் டத்தோ அசிசீ இச்மாயில் தெரிவித்ததாவது, கைது செய்யப்பட்டவர்களில் ஒருவரை சிலாங்கூரில், மற்ற இருவரை பூகிட் தெங்கா பகுதியில் போலீசார் பிடித்தனர். மேலும் ஒருவரை நாடு விட்டு தப்பிக்க முயன்றபோது பிடித்ததாகவும் தகவல்கள் வெளியாகியுள்ளன.
உயிரிழந்தவர்களில் 51 வயதான சரியா சே ஹின் மற்றும் 11 வயதான நூர் அஃப்ரினா அலிஷா அப்துல் ரஹீம் அடங்குவர். இருவரும் வீட்டின் உள்ளே கடுமையாக தாக்கப்பட்ட நிலையில் கண்டெடுக்கப்பட்டதாக போலீஸ் தெரிவித்துள்ளது.
போலீசார் இந்த வழக்கை குற்றச் சட்டத்தின் பிரிவு 302 (கொலை) கீழ் விசாரித்து வருகின்றனர். சம்பவத்தின் காரணம் குறித்து இன்னும் தெளிவான தகவல்கள் வெளியாகவில்லை என்றாலும், அது பழி அல்லது தனிப்பட்ட தகராறு காரணமாக இருக்கலாம் என சந்தேகிக்கப்படுகிறது.
இச்சம்பவம், வெளிநாட்டு தொழிலாளர்கள் வசிக்கும் பகுதிகளில் பாதுகாப்பு நடவடிக்கைகள் வலுப்படுத்தப்பட வேண்டிய அவசியத்தை மீண்டும் வெளிச்சமிட்டுள்ளது. மக்கள் சமூக விழிப்புணர்வுடன் இருப்பது முக்கியம் எனவும் போலீசார் வலியுறுத்தியுள்ளனர்.
-யாழினி வீரா
