Picture : Awani
Kuala Lumpur, 3 ஜூலை 2026: நாடு முழுவதும் உள்ள டாக்சி ஓட்டுநர்களின் வாழ்வாதாரத்தை மேம்படுத்தும் நோக்கில், கூடுதலாக RM10 மில்லியன் நிதி ஒதுக்கீட்டை பிரதமர் Datuk Seri Anwar Ibrahim அறிவித்துள்ளார். இந்த புதிய ஒதுக்கீட்டின் மூலம், Teksi MADANI திட்டத்திற்கான மொத்த நிதி RM20 மில்லியனாக உயர்ந்துள்ளது. இந்த திட்டத்தின் கீழ், டாக்சி ஓட்டுநர்கள் Proton S70 வாகனங்களை சிறப்பு சலுகை திட்டத்தின் மூலம் சொந்தமாகப் பெறும் வாய்ப்பு வழங்கப்படுகிறது.
பிரதமர் கூறுகையில், நீண்ட காலமாக டாக்சி ஓட்டுநர்கள் அதிக வாடகை, பழைய வாகனங்கள் மற்றும் அதிக பராமரிப்பு செலவுகள் போன்ற பல்வேறு சிரமங்களை எதிர்கொண்டு வருகின்றனர். இந்த நிலையை மாற்றுவதற்காகவே MADANI அரசாங்கம் நேரடியாக ஓட்டுநர்களுக்கு உதவும் இந்த திட்டத்தை செயல்படுத்தி வருவதாக அவர் தெரிவித்தார்.
மேலும், டாக்சி அனுமதிப்பத்திரங்கள் (Permit) ஓட்டுநர்களின் பெயரிலேயே இருக்க வேண்டும் என்றும், அவை செல்வந்தர்கள் அல்லது பெரிய நிறுவனங்களின் கட்டுப்பாட்டில் இருக்கக் கூடாது என்றும் பிரதமர் வலியுறுத்தினார். இதன் மூலம் டாக்சி ஓட்டுநர்களே தங்கள் தொழிலின் உண்மையான உரிமையாளர்களாக மாற முடியும் என்றார்.
இந்த திட்டத்தின் கீழ், புதிய வாகனங்களை குறைந்த விலையில் பெறுவதோடு, பராமரிப்பு செலவு, சேவை கட்டணம் மற்றும் நிதி வசதிகளிலும் சலுகைகள் வழங்கப்படும். மேலும், டிஜிட்டல் கட்டண முறைகள் மற்றும் புதிய தொழில்நுட்பப் பயிற்சிகளும் ஓட்டுநர்களுக்கு அறிமுகப்படுத்தப்படும் என்று அவர் தெரிவித்தார்.
இந்த நடவடிக்கைகளின் மூலம், தற்போது சராசரியாக RM3,000 வருமானம் பெறும் டாக்சி ஓட்டுநர்களின் மாதாந்திர வருமானத்தை RM5,000 முதல் RM7,000 வரை உயர்த்த அரசாங்கம் இலக்கு நிர்ணயித்துள்ளது. மேலும், டாக்சி ஓட்டுநர்கள் நாட்டின் சுற்றுலாத் துறையின் முக்கிய தூதுவர்களாக இருப்பதால், பணிவு, நேர்மை மற்றும் சுத்தமான சேவையின் மூலம் மலேசியாவின் நல்ல பெயரை உலகிற்கு எடுத்துச் செல்ல வேண்டும் என்றும் பிரதமர் கேட்டுக்கொண்டார்.
