Picture : Awani
நாட்டில் உருவாகும் வேலைவாய்ப்புகள் முதலில் உள்ளூர் மக்களுக்கு கிடைப்பதை உறுதி செய்வதற்கு அரசாங்கம் முன்னுரிமை வழங்கும் என்றும், வெளிநாட்டு தொழிலாளர்களின் தேவையை தொடர்ந்து ஆய்வு செய்து வருவதாகவும் பிரதமர் Datuk Seri Anwar Ibrahim தெரிவித்துள்ளார்.
வெளிநாட்டு தொழிலாளர்கள் சில துறைகளில் இன்னும் தேவைப்படுகின்றனர் என்பதை அரசு ஏற்றுக்கொண்டாலும், அவர்களை பணியமர்த்தும் நடவடிக்கைகள் விதிமுறைகள் மற்றும் சரியான நடைமுறைகளுக்கு உட்பட்டதாக இருக்க வேண்டும் என்று பிரதமர் கூறினார்.
Dewan Rakyat-இல் நடைபெற்ற கேள்வி நேரத்தின் போது, உள்ளூர் இளைஞர்களுக்கான வேலைவாய்ப்புகள் மற்றும் சிறு, நடுத்தர தொழில்கள் எதிர்கொள்ளும் தொழிலாளர் பற்றாக்குறை தொடர்பான கேள்விக்கு பதிலளித்த அவர், நாட்டில் ஏற்கனவே சட்டபூர்வமாக பணியாற்றும் வெளிநாட்டு தொழிலாளர்களை முதலில் பயன்படுத்துவதற்கான ஒருங்கிணைப்பு தேவை என்றும் தெரிவித்தார்.
பல ஆண்டுகளாக நீடித்து வரும் சட்டவிரோத வெளிநாட்டு தொழிலாளர் தொடர்பான பிரச்சினைகள் மற்றும் இடைத்தரகர்களின் முறைகேடுகள் கட்டுப்படுத்தப்பட வேண்டும் என்றும் Datuk Seri Anwar Ibrahim வலியுறுத்தினார். தொழிலாளர் தேவையை பூர்த்தி செய்யும் அதேவேளை, நாட்டின் பாதுகாப்பு அம்சங்களும் கவனத்தில் கொள்ளப்படும் என்றும் அவர் கூறினார்.
மேலும், குறிப்பிட்ட துறைகளில் நிபுணத்துவம் வாய்ந்த வெளிநாட்டு பணியாளர்களை மட்டுமே அனுமதிக்க வேண்டும் என்றும், தொழில்நுட்பம், டிஜிட்டல் மற்றும் செயற்கை நுண்ணறிவு (AI) போன்ற துறைகளில் உண்மையான திறமை கொண்டவர்களின் தேவையை அரசு பரிசீலிக்கும் என்றும் பிரதமர் தெரிவித்தார்.
விதிகளை மீறும் வெளிநாட்டு தொழிலாளர்கள் மற்றும் நிறுவனங்களுக்கு எதிராக அமலாக்க நடவடிக்கைகள் தொடர்ந்து கடுமையாக்கப்படும் என்றும் அவர் குறிப்பிட்டார். உள்ளூர் மக்களுக்கு அதிக வேலைவாய்ப்புகளை உருவாக்குவதுடன், தொழிலாளர் சந்தையில் சமநிலையை ஏற்படுத்துவதே அரசின் முக்கிய நோக்கம் என்றும் பிரதமர் தெரிவித்தார்.
