Picture : Awani
KUALA LUMPUR: Kota Damansara குடியிருப்புப் பகுதியில் முன்மொழியப்பட்டுள்ள தரவு மைய (Data Centre) கட்டுமானத் திட்டத்திற்கு எதிராக பொதுமக்கள் முன்வைத்துள்ள ஆட்சேபனைகள் விரைவில் Jemaah Menteri கூட்டத்தில் எடுத்துரைக்கப்படும் என்று Sungai Buloh நாடாளுமன்ற உறுப்பினரும் மனிதவள அமைச்சருமான Datuk Seri R. Ramanan தெரிவித்தார். இத்திட்டம் தொடர்பாக விரிவான வழிகாட்டுதல்கள் மற்றும் நடைமுறைகளை உருவாக்க வேண்டிய அவசியம் இருப்பதாகவும் அவர் கூறினார்.
நாட்டின் பொருளாதார வளர்ச்சிக்கும் முதலீடுகளுக்கும் தாம் எதிரானவர் அல்ல என்றும், ஆனால் எந்தவொரு பெரிய திட்டமும் உண்மைத் தகவல்கள், முழுமையான ஆய்வுகள் மற்றும் அனைத்து தரப்பினருடனான பொருத்தமான ஆலோசனைகளின் அடிப்படையில் மட்டுமே செயல்படுத்தப்பட வேண்டும் என்றும் Ramanan வலியுறுத்தினார்.
இந்தத் திட்டம் குறித்து தனது அதிகாரப்பூர்வ எதிர்ப்புக் கடிதத்தை Petaling Jaya மாநகராட்சியின் (MBPJ) Datuk Bandar-க்கு கடந்த ஜூலை 15-ஆம் தேதி அனுப்பியிருந்ததாகவும், இதுவரை அதற்கு எந்த அதிகாரப்பூர்வ பதிலும் கிடைக்கவில்லை என்றும் அவர் தெரிவித்தார்.
Kota Damansara குடியிருப்பாளர்களிடமிருந்து பல புகார்கள் கிடைத்ததைத் தொடர்ந்து, Sungai Buloh நாடாளுமன்ற மக்கள் சேவை மையம் ஆரம்பகட்ட ஆய்வை மேற்கொண்டது. அதில், திட்டத்தின் இடத் தேர்வு, சமூக நலன், சுற்றுச்சூழல் பாதிப்பு, தற்போதுள்ள உள்கட்டமைப்பின் மீதான தாக்கம் மற்றும் குடியிருப்பாளர்களின் வாழ்க்கைத் தரம் ஆகிய அம்சங்கள் கவனிக்கப்பட வேண்டிய முக்கிய விடயங்களாக அடையாளம் காணப்பட்டதாக அவர் கூறினார்.
மேலும், இந்தத் திட்டம் குறித்து தனது அலுவலகத்திற்கோ அல்லது மக்கள் சேவை மையத்திற்கோ முன்கூட்டியே எந்த தகவலும் வழங்கப்படவில்லை என்றும், பொதுமக்கள் நலன் தொடர்பான ஆலோசனைக் கூட்டங்களிலும் தங்களை இணைக்கவில்லை என்றும் Ramanan சுட்டிக்காட்டினார். மக்கள் வாழ்வை பாதிக்கக்கூடிய எந்தவொரு பெரிய திட்டமும் வெளிப்படைத்தன்மையுடனும், அனைத்து தரப்பினரின் பங்களிப்புடனும் செயல்படுத்தப்பட வேண்டும் என்றார். Kota Damansara மக்களின் குரல் உரிய அதிகாரிகளிடம் சென்றடையும் வரை இந்த விவகாரத்தை தொடர்ந்து கண்காணிப்பதாகவும் அவர் உறுதியளித்தார்.
