Picture : Awani
KUALA LUMPUR: அரசின் மொத்தக் கடன் அதிகரித்து வருவதற்கு புதிய கடன்களை அளவுக்கு மீறி பெறுவது காரணமல்ல; மாறாக, முந்தைய காலங்களில் பெறப்பட்ட கடன்களின் வட்டிச் செலவுகள் மற்றும் அவற்றைத் திருப்பிச் செலுத்த வேண்டிய நிதிப் பொறுப்புகளே முக்கிய காரணம் என்று பிரதமர் டத்தோ ஸ்ரீ அன்வார் இப்ராஹிம் தெரிவித்துள்ளார்.
Universiti Islam Selangor-ல் நடைபெற்ற மத்திய மண்டல அரசுப் பணியாளர்களுடனான சந்திப்பில் உரையாற்றிய அவர், டீசல் மற்றும் பெட்ரோலுக்கான மானியத்தை மேலும் அதிகரிக்க வேண்டும் என்ற கோரிக்கைகள் எழுந்தாலும், ஆண்டுக்கு சுமார் RM40 பில்லியன் கூடுதல் செலவாகும் என்பதால் அரசாங்கம் அதனை ஏற்க முடியாது என்றார். அத்தகைய நடவடிக்கை நாட்டின் கடன் சுமையை மேலும் உயர்த்தும் என்றும் அவர் விளக்கினார்.
“எரிபொருள் விலையை மேலும் குறைக்கலாம். ஆனால் அதற்கான செலவை யார் ஏற்கப் போகிறார்கள்? மேலும் கடன் வாங்கி நாட்டின் சுமையை அதிகரிக்க நான் விரும்பவில்லை,” என்று பிரதமர் கூறினார். தற்போது அரசாங்கம் புதிய கடன்களை குறைக்கும் முயற்சியில் ஈடுபட்டிருந்தாலும், பழைய கடன்களின் வட்டி மற்றும் தவணைத் தொகைகளை தொடர்ந்து செலுத்த வேண்டியிருப்பதால் மொத்தக் கடன் அளவு உயர்வதாக அவர் தெரிவித்தார்.
குறிப்பாக, 1MDB தொடர்பான நிதிப் பொறுப்புகளை தற்போதைய அரசாங்கமே ஏற்று செலுத்தி வருவதாகவும், கடந்தகால தவறான நிர்வாகத்தின் விளைவுகளை மக்கள் அறிந்து கொள்ள வேண்டியது அவசியம் என்றும் அன்வார் இப்ராஹிம் கூறினார். அதேபோல், FELDA அமைப்பின் தவறான முதலீடுகள் மற்றும் நிர்வாகக் குறைபாடுகள் காரணமாக ஆண்டுதோறும் சுமார் RM918 மில்லியன் செலவினை அரசாங்கம் ஏற்றுக்கொண்டு வருவதாகவும் அவர் குறிப்பிட்டார்.
மேலும், நாட்டின் நிதிச் சிக்கல்களுக்கு எந்த இனமும் காரணமல்ல என்றும், அதிகார துஷ்பிரயோகம், ஊழல் மற்றும் மோசமான நிர்வாகம்தான் உண்மையான காரணங்கள் என்றும் பிரதமர் வலியுறுத்தினார். பெரும்பாலான அரசுப் பணியாளர்கள் நேர்மையுடனும் அர்ப்பணிப்புடனும் பணியாற்றுவதாகக் குறிப்பிட்ட அவர், திறமையான நிர்வாகம், ஒழுக்கம் மற்றும் நல்லாட்சியே Malaysia-வின் பொருளாதாரத்தை வலுப்படுத்தும் அடித்தளமாக இருக்கும் என்றார்.
