Picture : Awani
KUALA LUMPUR, 26 ஆகஸ்ட் 2026: நாட்டில் நிலவும் புகைமூட்ட நிலை காரணமாக எதிர்வரும் 31 ஆகஸ்ட் தேசிய தினக் கொண்டாட்டம் ரத்து செய்யப்படாது என தகவல் தொடர்பு அமைச்சர் Fahmi Fadzil தெரிவித்துள்ளார். எனினும், பங்கேற்பாளர்கள் மற்றும் பொதுமக்களின் பாதுகாப்பு மற்றும் சுகாதாரத்தை உறுதி செய்வதற்காக கொண்டாட்டத்தின் அளவு அல்லது நடைபெறும் இடம் மாற்றப்படலாம் என அவர் கூறினார்.
புதன்கிழமை நடைபெற்ற அமைச்சரவைக் கூட்டத்தில் நாட்டின் பல பகுதிகளில் நிலவும் புகைமூட்ட நிலை குறித்து கவனம் செலுத்தப்பட்டதாக Fahmi Fadzil தெரிவித்தார். குறிப்பாக Putrajaya, Kuala Lumpur மற்றும் Sarawak ஆகிய பகுதிகளில் நிலைமை தீவிரமாக இருப்பதாக அவர் குறிப்பிட்டார். இதையடுத்து, தலைமைச் செயலாளர் Tan Sri Shamsul Azri Abu Bakar, தொடர்புடைய அமைச்சுகள் மற்றும் அரசுத் துறைகளுடன் இன்று மாலை கலந்துரையாடி அடுத்தகட்ட முடிவை எடுக்கப் பொறுப்பளிக்கப்பட்டுள்ளார்.
இந்தக் கலந்துரையாடலில் தகவல் தொடர்பு அமைச்சு, இயற்கை வளம் மற்றும் சுற்றுச்சூழல் நிலைத்தன்மை அமைச்சு, வானிலை ஆய்வுத் துறை, சுகாதார அமைச்சு மற்றும் கல்வி அமைச்சு ஆகியவை பங்கேற்கும். அடுத்த ஐந்து முதல் ஆறு நாட்களுக்கான வானிலை முன்னறிவிப்பும் புகைமூட்ட நிலை தொடர்பான சாத்தியக்கூறுகளும் மதிப்பீடு செய்யப்படும்.தேசிய தினக் கொண்டாட்டம் தற்போது Putrajaya-வில் நடைபெற திட்டமிடப்பட்டுள்ளது.
தேவையான சூழ்நிலை ஏற்பட்டால் வேறு இடத்துக்கு மாற்றுவது அல்லது நிகழ்ச்சியின் அளவைக் குறைப்பது குறித்து பரிசீலிக்கப்படும் என Fahmi தெரிவித்தார். மேலும், 30 ஆகஸ்ட் Kuala Lumpur-ல் நடைபெறவுள்ள தேசிய தினத்தை முன்னிட்டு நடைபெறும் இரவு நிகழ்ச்சியும் மறுபரிசீலனை செய்யப்படும். இந்தக் கொண்டாட்டத்தில் மூன்று மாநிலங்களைச் சேர்ந்த சுமார் 1,500 இடைநிலைப் பள்ளி மாணவர்கள் பங்கேற்கும் மனித உருவக் காட்சியும் இடம்பெறவுள்ளதால், அவர்களின் பாதுகாப்பு மற்றும் சுகாதாரத்துக்கும் முக்கியத்துவம் வழங்கப்படும் என அவர் தெரிவித்தார்.
