Picture : Awani
கோலாலம்பூர், 18 செப்டம்பர் 2026: முன்னாள் பிரதமர் நஜிப் ரசாக்கிற்கு விதிக்கப்பட்ட 50 மில்லியன் ரிங்கிட் அபராதத்தை செலுத்த உதவும் வகையில், அம்னோ கட்சி நிதி திரட்டும் நடவடிக்கையைத் தொடங்கியுள்ளது.
அம்னோ தலைவர் டத்தோஸ்ரீ அஹ்மத் ஜாஹிட் ஹமிடி வெளியிட்ட அறிக்கையில், இந்த நிதி திரட்டல் கட்சியின் தலைமைத்துவம், உறுப்பினர்கள், ஆதரவாளர்கள் மற்றும் விருப்பத்துடன் உதவ விரும்பும் எந்தவொரு தரப்பினருக்கும் திறந்திருக்கும் என்று தெரிவித்தார். இந்த முயற்சி வெளிப்படையாகவும் ஒழுங்குமுறையுடனும் மேற்கொள்ளப்படும் என்றும், நடைமுறையில் உள்ள அனைத்து விதிமுறைகள் மற்றும் சட்டங்களுக்கு இணங்கும் என்றும் அவர் கூறினார்.
முன்னதாக, மாமன்னர் சுல்தான் இப்ராஹிம், நஜிப் ரசாக்கிற்கு நிபந்தனையுடன் மன்னிப்பு வழங்கி, மீதமுள்ள தண்டனையை வீட்டுக் காவலில் அனுபவிக்க அனுமதி வழங்கியிருந்தார். அதன்படி, நஜிப் ரசாக் 2028ஆம் ஆண்டு ஆகஸ்ட் 23ஆம் தேதி வரை வீட்டுக் காவலில் தண்டனையை அனுபவிக்க முடியும். எனினும், இந்த நிபந்தனையுடன் கூடிய மன்னிப்பு 50 மில்லியன் ரிங்கிட் அபராதத்தை செலுத்துவதற்கு உட்பட்டதாகும். இந்த முடிவு கோலாலம்பூர், லாபுவான் மற்றும் புத்ராஜெயாவுக்கான மன்னிப்பு வாரியத்தின் 64ஆவது கூட்டத்தில் எடுக்கப்பட்டது.
இதனிடையே, வீட்டுக் காவல் தொடர்பான முடிவைத் தொடர்ந்து அம்னோ உறுப்பினர்கள் தங்களது ஒவ்வொரு கருத்திலும் ஒழுக்கத்தைப் பேணி, நிர்ணயிக்கப்பட்ட அனைத்து நடைமுறைகளையும் மதிக்க வேண்டும் என்றும் அஹ்மத் ஜாஹிட் கேட்டுக்கொண்டார். மாமன்னரின் விவேகம் மற்றும் கருணைக்கு அவர் நன்றியையும் தெரிவித்தார்.
