Picture : Awani
கோலாலம்பூர், 18 செப்டம்பர் 2026: முன்னாள் பிரதமர் நஜிப் ரசாக்கின் எஸ்ஆர்சி இன்டர்நேஷனல் வழக்கு தொடர்பான சட்ட நடவடிக்கைகள் 2018ஆம் ஆண்டு முதல் பல கட்டங்களை கடந்துள்ளன. தற்போது, மீதமுள்ள தண்டனையை வீட்டுக் காவலில் அனுபவிக்க அவருக்கு நிபந்தனையுடன் மன்னிப்பு வழங்கப்பட்டுள்ளது.
2018 ஜூலை 4ஆம் தேதி, எஸ்ஆர்சி இன்டர்நேஷனல் நிறுவனத்தின் 42 மில்லியன் ரிங்கிட் நிதி தொடர்பாக நஜிப் மீது நம்பிக்கை மோசடி மற்றும் அதிகார துஷ்பிரயோகம் உள்ளிட்ட நான்கு குற்றச்சாட்டுகள் பதிவு செய்யப்பட்டன. அதே ஆண்டு ஆகஸ்ட் 8ஆம் தேதி, மேலும் மூன்று பணமோசடி குற்றச்சாட்டுகள் சுமத்தப்பட்டன.
2019 ஏப்ரல் 3ஆம் தேதி வழக்கு விசாரணை தொடங்கியது. 2020 ஜூலை 28ஆம் தேதி, ஏழு குற்றச்சாட்டுகளிலும் நஜிப் குற்றவாளி என உயர் நீதிமன்றம் தீர்ப்பளித்து, 12 ஆண்டுகள் சிறைத்தண்டனையும் 210 மில்லியன் ரிங்கிட் அபராதமும் விதித்தது.
மேல்முறையீட்டு நடவடிக்கைகள் தொடர்ந்து நடைபெற்ற நிலையில், 2022 ஆகஸ்ட் 23ஆம் தேதி கூட்டாட்சி நீதிமன்றம் அவரது குற்றத் தீர்ப்பையும் தண்டனையையும் உறுதி செய்தது. அதே நாளில் அவர் சிறைத்தண்டனையைத் தொடங்கினார். 2022 செப்டம்பர் 2ஆம் தேதி, நஜிப் மாமன்னரிடம் மன்னிப்பு கோரி மனு தாக்கல் செய்தார். 2023 மார்ச் 31ஆம் தேதி, தண்டனையை மறுபரிசீலனை செய்ய அவர் மேற்கொண்ட இறுதி முயற்சியும் நிராகரிக்கப்பட்டது.
2024 ஜனவரி 29ஆம் தேதி, மன்னிப்பு வாரியம் சிறைத்தண்டனையை ஆறு ஆண்டுகளாகவும் அபராதத்தை 50 மில்லியன் ரிங்கிட்டாகவும் குறைத்தது. 2026 செப்டம்பர் 18ஆம் தேதி, மாமன்னர் சுல்தான் இப்ராஹிம் நிபந்தனையுடன் மன்னிப்பு வழங்கி, மீதமுள்ள தண்டனையை 2028 ஆகஸ்ட் 23ஆம் தேதி வரை வீட்டுக் காவலில் அனுபவிக்க அனுமதித்தார்.
