கோலாலம்பூர்: கடந்த ஆகஸ்ட் 26ஆம் தேதி நேபாளம் – திபெத் எல்லைப் பகுதியில் ஏற்பட்ட கடுமையான வெள்ளம் மற்றும் நிலச்சரிவுப் பேரிடரில் பாதிக்கப்பட்ட மலேசியர்களின் குடும்பங்களில் 28 குடும்பங்கள் சமூகப் பாதுகாப்பு அமைப்பான PERKESO வழங்கும் நிதியுதவியைப் பெறத் தகுதி பெற்றுள்ளன.
மனிதவள அமைச்சர் டத்தோஸ்ரீ ஆர். ரமணன் இதனைத் தெரிவித்தார். இந்தப் பேரிடரில் பாதிக்கப்பட்ட 54 பேரின் விவரங்களை PERKESO ஆய்வு செய்ததில், 28 பேர் உதவி பெறுவதற்கான தகுதிகளைப் பூர்த்தி செய்துள்ளதாக அவர் குறிப்பிட்டார்.
தகுதியுடைய குடும்பங்கள் எவரும் உரிய சமூகப் பாதுகாப்பிலிருந்து விடுபட்டுவிடக் கூடாது என்பதை உறுதிப்படுத்த PERKESO விரிவான ஆய்வுகளை மேற்கொண்டதாக அவர் கூறினார்.
அதன்படி, தகுதி பெற்ற ஒவ்வொரு குடும்பத்திற்கும் உடனடி நிதியுதவியாக RM3,000 வழங்கப்படும். மேலும், அவர்கள் PERKESO-வின் ஊனமுற்றோர் திட்டத்தின் கீழ் வழங்கப்படும் உயிரிழந்தவர்களுக்கான ஓய்வூதியப் பலனான Pencen Penakat உதவியையும் பெறத் தகுதி பெற்றுள்ளனர். தேவையான தகவல்கள் மற்றும் ஆவணங்கள் முழுமையடைந்ததும் இந்தப் பணம் வழங்கப்படும் என அவர் தெரிவித்தார்.
நேபாள வெள்ளம் மற்றும் நிலச்சரிவுப் பேரிடரில் பாதிக்கப்பட்டவர்களின் குடும்பங்களுக்கு PERKESO நலத்திட்ட உதவிகளை வழங்கும் நிகழ்ச்சி கோலாலம்பூரில் நடைபெற்றது. அதில் செய்தியாளர்களிடம் பேசியபோது அமைச்சர் இதனைத் தெரிவித்தார்.
கடந்த ஆகஸ்ட் 26ஆம் தேதி நேபாளத்தில் ஏற்பட்ட திடீர் வெள்ளம் மற்றும் கடுமையான நிலச்சரிவைத் தொடர்ந்து 55 மலேசியர்கள் தொடர்புகொள்ள முடியாத நிலையில் இருந்ததாக அறிவிக்கப்பட்டது.
நேபாளம் – சீனா எல்லைப் பகுதியிலுள்ள மலைப்பகுதியில் பனிப்பாறைகள் மற்றும் பாறைகள் சரிந்து விழுந்ததால் (Ice and Rock Avalanche) இந்தப் பேரிடர் ஏற்பட்டது. இதனால் சுனாமியைப் போன்ற பெருவெள்ளம் உருவாகி, குறிப்பாக நேபாளத்தின் ரசுவா மாவட்டத்தில் லெண்டே கோலா மற்றும் திரிசூலி ஆறுகளின் கரையோரப் பகுதிகளில் உள்ள குடியிருப்புகள் பெரும் சேதமடைந்தன.
இன்றைய நிகழ்ச்சியில் 16 குடும்பங்கள் மட்டுமே நேரடியாகக் கலந்துகொண்டு உதவித்தொகையைப் பெற்றுக்கொண்டதாகவும், ஏனைய குடும்பங்களுக்கு உதவிகள் படிப்படியாக வழங்கப்படும் என்றும் ரமணன் தெரிவித்தார்.
28 குடும்பங்களுக்கும் வழங்கப்படவுள்ள மொத்த உதவித்தொகை RM174,000 ஆகும்.
மேலும், நாடு முழுவதும் தகுதியுடைய குடும்ப உறுப்பினர்களைக் கண்டறிந்து அவர்களின் விவரங்களைப் பூர்த்தி செய்யும் நடவடிக்கைகளை PERKESO தொடர்ந்து மேற்கொள்ளும் என அவர் கூறினார்.
இதுவரை PERKESO-விடமிருந்து தொடர்பு கிடைக்காத உயிரிழந்தவர்களின் குடும்ப உறுப்பினர்கள், தங்களுக்கு அருகிலுள்ள PERKESO அலுவலகத்தை அணுகுமாறும் அவர் கேட்டுக்கொண்டார்.
இதற்கிடையில், PERKESO-வில் பங்களிப்புப் பதிவு இல்லாத பாதிக்கப்பட்டவர்களுக்கும் உதவ நடவடிக்கை எடுக்கப்படும் என அமைச்சர் உறுதியளித்தார். அவர்களின் விவரங்கள் Social Synergy திட்டத்தின் கீழ் 130 தொடர்புடைய அமைப்புகள் உட்பட 990 மூலோபாயக் கூட்டாளர்களிடம் தெரிவிக்கப்பட்டு, உரிய உதவிகளைப் பெற்றுத்தர முயற்சிகள் மேற்கொள்ளப்படும் என்றார்.
சமூகப் பாதுகாப்பு என்பது ஒரு சலுகை மட்டுமல்ல; தொழில்துறை, வேலைவாய்ப்பு வகை, பணிநிலை அல்லது முதலாளி யார் என்ற வேறுபாடின்றி ஒவ்வொரு தொழிலாளிக்கும் கிடைக்க வேண்டிய அடிப்படை சமூகநீதி உரிமை என்றும் அவர் வலியுறுத்தினார்.
