Picture : Awani
கோலாலம்பூர்: பிரதமர் டத்தோ ஸ்ரீ அன்வார் இப்ராஹிம், அண்மையில் சீனாவின் ஷாங்காய் மற்றும் ஹாங்சோ நகரங்களுக்கு மேற்கொண்ட மூன்று நாள் பணிப் பயணம் அர்த்தமுள்ள பலன்களைத் தந்துள்ளதாகத் தெரிவித்துள்ளார்.
மலேசியாவுக்கும் சீனாவுக்கும் இடையிலான முதலீட்டு வாய்ப்புகள் மற்றும் வர்த்தக ஒத்துழைப்புக்கான புதிய சாத்தியங்களை ஆராய்வதில் இந்தப் பயணம் முக்கியத்துவம் பெற்றதாக அவர் கூறினார். இதன் மூலம் இரு நாடுகளின் மக்களுக்கும் மேலும் வளமும் நன்மையும் கிடைக்கும் என்று அவர் தெரிவித்தார்.
இரு நாடுகளுக்கும் இடையிலான தூதரக உறவுகள் தற்போது மிக உயர்ந்த நிலையில் இருப்பதாக அன்வார் குறிப்பிட்டார். இந்த வலுவான உறவைப் பயன்படுத்தி புதிய வாய்ப்புகளைத் தொடர்ந்து ஆராய்வதுடன், மேலும் சிறப்பான ஒத்துழைப்புகளையும் உருவாக்க வேண்டும் என்றும் அவர் கூறினார்.
சீனாவில் நடைபெற்ற உலகத் திறனாளர் போட்டி மற்றும் உச்சி மாநாடு, உலகளாவிய எண்ணிம வர்த்தகக் கண்காட்சி ஆகியவற்றில் மலேசியா பங்கேற்றது, சர்வதேச அரங்கில் நாட்டின் திறன்களை வெளிப்படுத்தியதாக பிரதமர் தெரிவித்தார்.
மேலும், செயற்கை நுண்ணறிவு மற்றும் தொழில்நுட்ப வளர்ச்சியை முன்னெடுக்கும் போது மனிதநேயம் மற்றும் விழுமியங்கள் புறக்கணிக்கப்படக் கூடாது என்ற மலேசியாவின் உறுதியான நிலைப்பாட்டையும் அவர் எடுத்துரைத்தார். உலகளாவிய போட்டி காரணமாக நிச்சயமற்ற சூழல் நிலவும் நிலையில், உரையாடல் மற்றும் ஒத்துழைப்பு மூலம் முன்னேற வேண்டும் என்றும், அதன் வழியாக மேலும் நியாயமான மற்றும் சமத்துவமான உலகை உருவாக்க வேண்டும் என்றும் அன்வார் வலியுறுத்தினார்.
மலேசியாவுக்கும் சீனாவுக்கும் இடையிலான உறவுகள் தொடர்ந்து வலுப்பெற்று வருவதாகவும், இரு நாடுகளுக்கும் இடையிலான ஒத்துழைப்பை புதிய துறைகளில் விரிவுபடுத்துவதற்கான வாய்ப்புகள் அதிகரித்துள்ளதாகவும் அவர் குறிப்பிட்டார்.
சீனப் பயணத்தின்போது, ஷாங்காயில் நடைபெற்ற உலகத் திறனாளர் போட்டியிலும், ஹாங்சோவில் நடைபெற்ற உலகளாவிய எண்ணிம வர்த்தகக் கண்காட்சியிலும் பிரதமர் பங்கேற்றார். சீனப் பிரதமர் லி சியாங் விடுத்த அழைப்பின் பேரில் இந்தப் பயணம் மேற்கொள்ளப்பட்டது.
தொடர்ந்து, மலேசிய மக்களின் நலனையும் நாட்டின் முன்னேற்றத்தையும் கருத்தில் கொண்டு, மதானி தூதரகப் பயணத் திட்டத்தை முன்னெடுக்கத் தாம் உறுதியாக இருப்பதாகவும் அன்வார் தெரிவித்தார். இரு நாடுகளுக்கும் இடையிலான நெருக்கமான உறவு எதிர்காலத்தில் மேலும் புதிய வாய்ப்புகளையும் பயன்களையும் உருவாக்கும் என அவர் நம்பிக்கை தெரிவித்தார்.
