Picture : Awani
சீனாவுக்கு எதிராக அடுத்த மாதம் நடைபெறவுள்ள இரண்டு சர்வதேச முதல்தர நட்புப் போட்டிகள், தரவரிசைப் புள்ளிகளைப் பெறுவதற்கான வாய்ப்பாக மட்டுமின்றி, மலேசிய தேசிய அணியின் எதிர்காலத்திற்கான வீரர்களை மதிப்பீடு செய்வதற்கான முக்கிய களமாகவும் அமையும் என இடைக்கால தலைமைப் பயிற்றுநர் டான் செங் ஹோ தெரிவித்துள்ளார்.
குவாங்சோவில் நடைபெறவுள்ள இந்த இரண்டு போட்டிகளும் மலேசிய அணிக்கு சர்வதேச அரங்கில் தரமான தயாரிப்பைப் பெறுவதற்கு உதவும் நேர்மறையான முயற்சி என அவர் குறிப்பிட்டார். ஆசிய அளவில் சிறந்த அனுபவமும் வலிமையும் கொண்ட சீன அணி, மலேசிய வீரர்களுக்கு பயனுள்ள சவாலை வழங்கும் என்றும் செங் ஹோ கூறினார். எதிர்காலத்திற்கான தேசிய அணியைத் தயார்படுத்தும் வகையில் இந்தப் போட்டிகள் திட்டமிடப்பட்டிருப்பதாகவும், எதிர்காலத்தில் அணிக்குத் தேவையான வீரர்களைத் தேர்ந்தெடுப்பதற்கு இரண்டு ஆட்டங்களும் சிறந்த வாய்ப்பை வழங்கும் என்றும் அவர் தெரிவித்தார்.
மலேசிய கால்பந்து சங்கத் தலைவர் அப்துல் கானி ஹசான் முன்னதாக வெளியிட்ட தகவலின்படி, மலேசியா மற்றும் சீனா அணிகள் நவம்பர் 14 மற்றும் 17 ஆகிய தேதிகளில் குவாங்சோவில் இரண்டு முதல்தர நட்புப் போட்டிகளில் சந்திக்க உள்ளன. இந்த இரண்டு போட்டிகளும் உலகத் தரவரிசைப் புள்ளிகளைச் சேகரிப்பதுடன், 2030 உலகக் கிண்ணம் மற்றும் 2032 ஆசியக் கிண்ணத் தகுதிச் சுற்றுகளுக்கான சிறந்த குழுவில் இடம்பெறுவதற்கும் முக்கியமானவை என தெரிவிக்கப்பட்டுள்ளது.
தற்போது மலேசியா உலகத் தரவரிசையில் 136ஆவது இடத்திலும், சீனா 91ஆவது இடத்திலும் உள்ளன. இரு அணிகளும் கடைசியாக 2023 செப்டம்பரில் செங்டுவில் நடைபெற்ற சர்வதேச முதல்தர நட்புப் போட்டியில் சந்தித்தபோது, ஆட்டம் 1-1 என்ற கோல் கணக்கில் சமநிலையில் முடிந்தது.
