Picture : Awani
கோலாலம்பூர்: பிரதமர் அன்வார் இப்ராஹிம் தலைமையிலான மடானி அரசாங்கத்தின் அமைச்சரவை உறுப்பினர்கள், நாட்டின் அரசியல் நிலைத்தன்மையைப் பாதுகாப்பதிலும், தற்போதைய நிர்வாகத்தின் பதவிக்காலம் முடியும் வரை தங்களது கடமைகளையும் பொறுப்புகளையும் தொடர்ந்து நிறைவேற்றுவதிலும் உறுதியாக இருப்பதாக தகவல் மற்றும் தொடர்புத்துறை அமைச்சர் ஃபஹ்மி ஃபட்சில் தெரிவித்துள்ளார்.
அமைச்சரவையில் இடம்பெற்றுள்ள அனைத்து கட்சிகளும் நாட்டின் நிலைத்தன்மையை உறுதிப்படுத்தும் வகையில் தொடர்ந்து ஒத்துழைத்து வருவதாக அவர் கூறினார். அண்மையில் முன்னாள் பிரதமர் நஜிப் ரசாக்கிற்கு வழங்கப்பட்ட நிபந்தனை மன்னிப்பு தொடர்பான அரசியல் விவகாரங்களும், பக்காத்தான் ஹராப்பான் மற்றும் பாரிசான் நேஷனல் இடையிலான உறவுகளை பாதிக்கவில்லை என்றும் அவர் தெரிவித்தார்.
அரசியல் நிலைத்தன்மையும் அரசாங்கத்தின் கொள்கைகளும் முதலீட்டாளர்கள் ஒரு நாட்டில் முதலீடு செய்வதற்கு முக்கியமாகக் கவனிக்கும் அம்சங்கள் என ஃபஹ்மி குறிப்பிட்டார். கடந்த நான்கு ஆண்டுகளில் மடானி அரசாங்கம் பொருளாதாரத்தை மேம்படுத்தியுள்ளதாகவும், மொத்த உள்நாட்டு உற்பத்தியின் வளர்ச்சி குறிப்பிடத்தக்க அளவை எட்டியுள்ளதாகவும் அவர் கூறினார். நாட்டின் நலனுக்காக அரசியல் கட்சிகளின் தலைவர்கள் தங்களுக்கிடையிலான வேறுபாடுகளை ஒதுக்கி வைக்கத் தயாராக இருப்பார்கள் என தாம் நம்புவதாகவும் ஃபஹ்மி தெரிவித்தார்.
நஜிப் தொடர்பான நிபந்தனை மன்னிப்பு விவகாரத்தில், அரசாங்கத்தின் நிலைப்பாடு தனிப்பட்ட பழிவாங்கல் அடிப்படையிலானது அல்ல என்றும், அரசியலமைப்பு மற்றும் நாட்டின் சட்டங்களை அடிப்படையாகக் கொண்ட கொள்கை முடிவு என்றும் அவர் விளக்கினார்.
மேலும், எதிர்காலத்தில் நாடாளுமன்றத்தில் தெளிவான பெரும்பான்மை இல்லாத நிலை ஏற்பட்டால், நாட்டின் அரசியல் நிலைத்தன்மைக்காக வெவ்வேறு கட்சிகள் மீண்டும் இணைந்து அரசாங்கத்தை அமைப்பதற்கான வாய்ப்பு இருப்பதையும் ஃபஹ்மி நிராகரிக்கவில்லை.
