Picture : Awani
இஸ்கந்தர் புத்ரி: Johor Darul Ta’zim FC (JDT), தனது ரசிகர்களை கழகத்துடன் மேலும் நெருக்கமாக இணைக்கும் நோக்கில் JDT+ எனப்படும் புதிய கட்டண உறுப்பினர் தளத்தை அறிமுகப்படுத்தவுள்ளது.
இந்தத் தளம் அக்டோபர் 22ஆம் தேதி அதிகாரப்பூர்வமாக தொடங்கப்படவுள்ளது. இதன் மூலம் ரசிகர்கள், போட்டி நாட்களைத் தாண்டி கழகத்தின் செயல்பாடுகள், வீரர்களின் பயிற்சிகள் மற்றும் அவர்களின் அன்றாட வாழ்க்கை தொடர்பான பிரத்யேக உள்ளடக்கங்களைப் பார்வையிட முடியும்.
JDT தலைமை நிர்வாக அதிகாரி Luis Garcia கூறுகையில், ரசிகர்கள் பொதுவாக வீரர்களை ஆடுகளத்தில் மட்டுமே பார்க்கும் வாய்ப்பைப் பெறுகின்றனர் என்றார். எனவே, JDT+ மூலம் வீரர்களின் ஆடுகளத்திற்கு வெளியேயான வாழ்க்கையையும், அவர்கள் எதிர்கொள்ளும் சவால்களையும் ரசிகர்களுடன் பகிர்ந்து கொள்ள விரும்புவதாக அவர் தெரிவித்தார்.
JDT+ தளத்தில் முதலாவது முக்கிய ஆவணப்படமாக 76 நிமிடங்கள் கொண்ட UNTAMED இடம்பெறவுள்ளது. இது JDT தென்கிழக்காசியாவின் முன்னணி கால்பந்து கழகங்களில் ஒன்றாக வளர்ந்த பயணத்தையும், Johor Regent Tunku Mahkota Ismail-ன் தலைமையையும் மையமாகக் கொண்டுள்ளது. அதனைத் தொடர்ந்து OUTBOUND எனப்படும் வருடாந்திர ஆவணப்படத் தொடரும் இடம்பெறும். இது AFC Champions League Elite போட்டியில் JDT பங்கேற்கும் பயணத்தை மையமாகக் கொண்டிருக்கும்.
JDT+ தளத்தின் இறுதி சந்தா கட்டணம் மற்றும் உறுப்பினர் திட்டங்கள் அக்டோபர் 22ஆம் தேதி அறிவிக்கப்படும். எனினும், வருடாந்திர சந்தா RM100-க்கும் குறைவாக இருக்கும் என எதிர்பார்க்கப்படுகிறது. தொடக்கத்தில் இந்த சேவையை இணையதளம் வழியாகப் பயன்படுத்த முடியும். பின்னர் இரண்டு முதல் மூன்று மாதங்களுக்குள் தனிப்பட்ட கைப்பேசி செயலியும் அறிமுகப்படுத்தப்படவுள்ளது.
