Picture : Awani
கோலாலம்பூர், அக்டோபர் 1 — மூன்று தசாப்தங்களுக்கும் மேலாக இடைநிறுத்தப்பட்டிருந்த நாடாளுமன்ற சேவைச் சட்டம் 2025, இன்று முதல் மீண்டும் அமலுக்கு வந்துள்ளது. இதன் மூலம் நாடாளுமன்றத்தின் நிர்வாகம் மற்றும் பணியாளர் விவகாரங்களை தனித்த முறையில் நிர்வகிப்பதற்கான அதிகாரம் வலுப்பெற்றுள்ளது.
பிரதமர் துறையின் சட்டம் மற்றும் நிறுவனச் சீர்திருத்த அமைச்சரான டத்தோஸ்ரீ அஸாலினா ஒத்மான் சைட், இந்தச் சட்டம் மீண்டும் அமல்படுத்தப்பட்டிருப்பது நாட்டின் நிறுவனச் சீர்திருத்தப் பயணத்தில் முக்கியமான முன்னேற்றம் எனத் தெரிவித்தார். இந்தச் சட்டத்தின் மூலம் நாடாளுமன்றத்துக்கென தனியான சேவை அமைப்பு உருவாக்கப்பட்டு, அதன் நிர்வாகம், பணியாளர் நிர்வாகம் மற்றும் உள்நாட்டு விவகாரங்களை அதிக சுதந்திரத்துடன் நிர்வகிக்க முடியும் என அவர் கூறினார்.
நாடாளுமன்ற சேவைச் சட்டம் 1963, 1992ஆம் ஆண்டு அரசியலமைப்புத் திருத்தத்தின் மூலம் ரத்து செய்யப்பட்டது. அதன்பின்னர் 34 ஆண்டுகளுக்குப் பின்னர் புதிய நாடாளுமன்ற சேவைச் சட்டம் மீண்டும் நடைமுறைக்கு வந்துள்ளது. இந்தச் சட்டம் சட்டமன்றத்தின் நிறுவன சுதந்திரத்தை வலுப்படுத்துவதுடன், சட்டமன்றம், நிர்வாகம் மற்றும் நீதித்துறை ஆகியவற்றுக்கு இடையிலான அதிகாரப் பிரிவையும் மேலும் உறுதிப்படுத்தும் என அஸாலினா தெரிவித்தார்.
நாடாளுமன்ற சேவைச் சட்டம் 2025, 2025ஆம் ஆண்டு பிப்ரவரி 24-ஆம் தேதி மக்களவையில் முதல் வாசிப்புக்கு தாக்கல் செய்யப்பட்டது. பின்னர் மக்களவை மற்றும் மேலவையில் நிறைவேற்றப்பட்டு, மாமன்னரின் ஒப்புதலுக்குப் பிறகு 2025 ஜூலை 18-ஆம் தேதி அரசிதழில் வெளியிடப்பட்டது.
