Picture : Awani
மலேசியாவுக்கான சீனாவின் 16ஆவது தூதராகப் பணியாற்றிய ஓயாங் யூஜிங், தமது பதவிக்காலம் நிறைவடைய உள்ள நிலையில், மலேசியா தமது இரண்டாவது வீடாக மாறிவிட்டதாகத் தெரிவித்துள்ளார்.
மலேசியாவில் கிட்டத்தட்ட ஐந்து ஆண்டுகள் பத்து மாதங்கள் பணியாற்றிய அவர், இரு நாடுகளுக்கும் இடையிலான ஒத்துழைப்பை வலுப்படுத்தவும், சீனா மற்றும் மலேசிய மக்களிடையேயான உறவை மேலும் நெருக்கமாக்கவும் பங்களித்தது பெருமையாக இருப்பதாகக் கூறினார். எதிர்காலம் தம்மை எங்கு அழைத்துச் சென்றாலும், தமது இதயத்தின் ஒரு பகுதி எப்போதும் மலேசியாவில் இருக்கும் என்றும், சீனா–மலேசியா உறவின் வளர்ச்சிக்கு தொடர்ந்து ஆதரவளிப்பேன் என்றும் அவர் தெரிவித்தார்.
சீன மக்கள் குடியரசு நிறுவப்பட்ட 77ஆவது ஆண்டு விழா மற்றும் தமது மலேசியப் பணிக்கால நிறைவு நிகழ்ச்சியில் உரையாற்றிய அவர், தமது பணிக்காலத்தில் இரு நாடுகளின் உறவு பல்வேறு துறைகளில் புதிய உயரங்களை எட்டியதை நேரில் காண முடிந்ததாகக் கூறினார். கடந்த ஆண்டு மட்டும் சீனாவிலிருந்து 46 லட்சத்து 60 ஆயிரம் சுற்றுலாப் பயணிகள் மலேசியாவுக்கு வந்துள்ளனர். அதேவேளை, சீனாவுக்கு மலேசியாவிலிருந்து சுமார் 23 லட்சத்து 60 ஆயிரம் பேர் சென்றுள்ளனர். இந்த ஆண்டின் முதல் ஆறு மாதங்களில் மட்டும் சீனாவிலிருந்து 31 லட்சத்து 30 ஆயிரம் பயணிகள் மலேசியா வந்துள்ளனர்.
இரு நாடுகளுக்கும் இடையிலான கல்விப் பரிமாற்றமும் வளர்ச்சி கண்டுள்ளது. மலேசியாவில் பயிலும் சீன மாணவர்களின் எண்ணிக்கை 3,820-இல் இருந்து 73 ஆயிரத்துக்கும் அதிகமாக உயர்ந்துள்ளது. மேலும், மலேசியாவின் வெப்பமண்டலப் பழங்கள் சீனாவில் அதிக வரவேற்பைப் பெற்று வருவதாகவும், அறுவடை செய்யப்பட்ட 48 மணி நேரத்துக்குள் முசாங் கிங் துரியான் சீன நுகர்வோரின் உணவு மேசையைச் சென்றடைவதாகவும் அவர் தெரிவித்தார்.
மலேசியாவின் 13 மாநிலங்களையும் சுற்றிப் பார்த்துள்ளதாகக் கூறிய ஓயாங், அந்நாட்டின் வரலாறு, பண்பாடு, பாரம்பரியம் மற்றும் மக்களின் அன்பை நெருக்கமாக அறிந்துகொண்டதாகவும், இவை அனைத்தும் சீனா–மலேசியா உறவின் எதிர்காலம் குறித்த தமது நம்பிக்கையை மேலும் வலுப்படுத்தியுள்ளதாகவும் தெரிவித்தார்.
