Picture : Awani
SHAH ALAM: — சிலாங்கூர் சுல்தான் சுல்தான் ஷராஃபுடின் இத்ரிஸ் ஷாவின் 25 ஆண்டுகால ஆட்சியைக் கொண்டாடும் வெள்ளி விழாவை முன்னிட்டு அறிவிக்கப்பட்டுள்ள நிகழ்வு விடுமுறையை மாநிலத்தில் உள்ள தனியார் துறை முதலாளிகள் கடைப்பிடிக்க வேண்டும் என தீபகற்ப மலேசிய தொழிலாளர் துறை தெரிவித்துள்ளது.
அக்டோபர் 25-ஆம் தேதி அறிவிக்கப்பட்டுள்ள இந்த விடுமுறை, சிலாங்கூரில் உள்ள தனியார் துறை ஊழியர்களுக்கு ஊதியத்துடன் கூடிய பொது விடுமுறையாக வழங்கப்பட வேண்டும் என அந்தத் துறை தெரிவித்துள்ளது. அக்டோபர் 25-ஆம் தேதி ஞாயிற்றுக்கிழமை என்பதால், ஞாயிற்றுக்கிழமையை வாராந்திர ஓய்வு நாளாகக் கொண்டுள்ள முதலாளிகள், அதற்குப் பதிலாக அக்டோபர் 26ஆம் தேதியை மாற்று பொது விடுமுறையாக வழங்க வேண்டும்.
இந்த நடைமுறை 1955-ஆம் ஆண்டு வேலைவாய்ப்புச் சட்டத்தின் 60டி(1) பிரிவுக்கு ஏற்ப அமைய வேண்டும் என தெரிவிக்கப்பட்டுள்ளது. அதேவேளை, முதலாளியும் பணியாளரும் பரஸ்பரமாக உடன்பட்டால், ஊதியத்துடன் கூடிய அந்த விடுமுறையை வேறு நாளுக்கு மாற்றிக்கொள்ளவும் சட்டம் அனுமதிக்கிறது.
1951-ஆம் ஆண்டு பொது விடுமுறைச் சட்டத்தின் 9(1) துணைப்பிரிவின் அடிப்படையில் சிலாங்கூர் மாநில அரசு இந்த நிகழ்வு விடுமுறையை அறிவித்துள்ளது. மாநில அரசு தனது மாநிலத்திற்கான குறிப்பிட்ட நாளை பொது விடுமுறையாக அறிவிக்க இந்தச் சட்டம் அனுமதிக்கிறது. கடந்த செப்டம்பர் 11-ஆம் தேதி, சுல்தான் ஷராஃபுடின் இத்ரிஸ் ஷாவின் வெள்ளி விழாவை முன்னிட்டு அக்டோபர் 26ஆம் தேதியை மாற்று பொது விடுமுறையாக சிலாங்கூர் மாநில அரசு அறிவித்தது.
விழாவின் முக்கிய நிகழ்வுகள் அக்டோபர் 25-ஆம் தேதி நடைபெறுவதுடன், அது ஞாயிற்றுக்கிழமையாக அமைந்துள்ளதால், அடுத்த நாளான அக்டோபர் 26-ஆம் தேதி மாற்று விடுமுறையாக நிர்ணயிக்கப்பட்டுள்ளது. இதன் மூலம், வெள்ளி விழா கொண்டாட்டத்தில் தனியார் துறை ஊழியர்களும் பங்கேற்கும் வகையில் தேவையான விடுமுறை ஏற்பாடுகள் உறுதி செய்யப்பட்டுள்ளன.
