Picture : Awani
BUKIT MERTAJAM: பிரதமர் டத்தோ ஸ்ரீ அன்வார் இப்ராஹிமின் மூத்த சகோதரர் அல்லாஹ்யார்ஹாம் இட்ருஸ் இப்ராஹிமின் உடல், இன்று வெள்ளிக்கிழமை பிற்பகல் செருக் தோக் குன் கீழ்ப்பகுதி இஸ்லாமிய மயானத்தில் நல்லடக்கம் செய்யப்பட்டது. வெள்ளிக்கிழமை தொழுகைக்குப் பின்னர் அவரது நல்லடக்கச் சடங்குகள் நடைபெற்றன.
குடும்பத்தினரால் ‘ஆசிரியர் இத்ருஸ்’ என அன்புடன் அழைக்கப்பட்ட அவர், பிரதமரின் குடும்பத்தினருக்கும் சமூகத்தினருக்கும் பல்வேறு வகைகளில் சேவையாற்றியவராக அறியப்பட்டார். அவரது நல்லடக்கத்தின்போது வானிலை மேகமூட்டமாக காணப்பட்டதுடன், குடும்பத்தினர், உறவினர்கள், நண்பர்கள் மற்றும் பல்வேறு வயதினரும் இனங்களையும் சேர்ந்த உள்ளூர் மக்கள் திரளாகக் கலந்துகொண்டு இறுதி மரியாதை செலுத்தினர்.
செருக் தோக் குன் ஜாமெக் பள்ளிவாசலின் முதல் இமாம் உஸ்தாஸ் தெங்கு ஸஹாரி தெங்கு பஹாரோம் தலைமையில் மறைந்தவருக்கான இறுதி பிரார்த்தனையும் நினைவூட்டல் உரையும் நடைபெற்றன. நல்லடக்கப் பணிகள் பிற்பகல் 2.50 மணியளவில் நிறைவடைந்தன.
இதற்கு முன்னதாக, நூற்றுக்கணக்கானோர் பங்கேற்ற இறுதித் தொழுகை, செருக் தோக் குன் பள்ளிவாசலின் தற்காலிகத் தொழுகை மண்டபத்தில் நடைபெற்றது. பினாங்கு மாநில முஃப்தி இணைப் பேராசிரியர் டத்தோ டாக்டர் முகமது சுக்கி ஒத்மான் தொழுகையை வழிநடத்தினார். பிரதமர் அன்வாரும் இதில் கலந்துகொண்டார்.
அதற்கு முன்னர், பிரதமர் அன்வார் கிராம மக்களுடன் இணைந்து தனது சகோதரரின் உடலை பள்ளிவாசலுக்கு அழைத்துச் சென்றார். அவரது இல்லத்திலிருந்து சுமார் 200 மீட்டர் தொலைவில் அமைந்திருந்த தொழுகை மண்டபத்துக்கு உடல் கொண்டு செல்லப்பட்டது. மூன்று நாள் சீனப் பணிப்பயணத்தை முடித்துக்கொண்டு மலேசியா திரும்பியபோது, தனது சகோதரர் மறைந்த செய்தியை அன்வார் சமூக வலைத்தளப் பதிவின் மூலம் வியாழக்கிழமை பகிர்ந்திருந்தார்.
மறைந்த இத்ருஸ் இப்ராஹிம் தூக்கத்தில் உடல்நலக் குறைவு காரணமாக உயிரிழந்ததாக அவரது மகள் ஆய்டா ரஃபிஸா தெரிவித்தார். மதியத் தொழுகைக்குப் பின்னர் அவர் உறங்கச் சென்றதாகவும், பின்னர் பிற்பகல் தொழுகைக்குத் தயாராகியிருக்கலாம் என்றும் தெரிவிக்கப்பட்டுள்ளது.
