Picture : Awani
நகோயா, அக். 2 – ஆசிய விளையாட்டு போட்டியின் மகளிர் அணி ஸ்குவாஷ் பிரிவில் மலேசியா மீண்டும் தங்கப் பதக்கத்தை வென்றுள்ளது. இன்று நகோயா கின்ஜோ ஃபுடோ அரங்கில் நடைபெற்ற இறுதிப் போட்டியில் மலேசிய அணி 2-1 என்ற கணக்கில் ஹொங்கொங்கை வீழ்த்தியது.
இந்த வெற்றியின் மூலம், கடந்த 2022ஆம் ஆண்டு சீனாவின் ஹாங்சோ நகரில் நடைபெற்ற ஆசிய விளையாட்டுப் போட்டியில் வென்ற தங்கப் பதக்கத்தை மலேசியா மீண்டும் தக்கவைத்துள்ளது. இறுதிப் போட்டியின் முதல் ஆட்டத்தில் மலேசியாவின் ஐஃபா அஸ்மான், ஹொங்கொங்கின் ஹோ சே லொக்கை 11-9, 11-9, 12-10 என்ற புள்ளிக் கணக்கில் வீழ்த்தி மலேசியாவுக்கு முதல் வெற்றியைப் பெற்றுத் தந்தார்.
இதையடுத்து நடைபெற்ற இரண்டாவது ஆட்டத்தில், மலேசியாவின் எஸ். சிவசங்கரி ஹொங்கொங்கின் சான் சின் யுக்கிடம் 7-11, 11-9, 11-9, 5-11, 7-11 என்ற கணக்கில் தோல்வியடைந்தார். இதனால் இரு அணிகளும் தலா ஒரு வெற்றியுடன் சமநிலையை எட்டின. இதன் பின்னர் நடைபெற்ற தீர்மானிக்கும் மூன்றாவது ஆட்டத்தில் மலேசியாவின் ஐரா அஸ்மான் சிறப்பாக விளையாடி, ஹொங்கொங்கின் லீ கா யியை 11-9, 11-5, 11-4 என்ற நேரடி ஆட்டக் கணக்கில் வீழ்த்தினார்.
இதன் மூலம் மலேசியா 2-1 என்ற கணக்கில் வெற்றி பெற்று மகளிர் அணி ஸ்குவாஷ் பிரிவின் தங்கப் பதக்கத்தைத் தக்கவைத்தது. இந்த வெற்றி, ஆசிய விளையாட்டுப் போட்டியில் மலேசியா ஸ்குவாஷ் அணியின் தொடர்ச்சியான சிறப்பான செயல்பாட்டை மீண்டும் உறுதிப்படுத்தியுள்ளது.
