Picture : Awani
SHANGHAI: தொழில்நுட்ப வளர்ச்சிக்கும் தொழில்துறை முன்னேற்றத்திற்கும் ஏற்ப உயர்திறன் கொண்ட பணியாளர்களை மலேசியா தொடர்ந்து உருவாக்க வேண்டும் என்று பிரதமர் அன்வார் இப்ராஹிம் வலியுறுத்தியுள்ளார்.
குறிப்பாக குறைக்கடத்தி, செயற்கை நுண்ணறிவு மற்றும் புதுப்பிக்கத்தக்க எரிசக்தி போன்ற எதிர்கால பொருளாதாரத்தின் முக்கிய துறைகளில் திறமையான மனிதவளத்தை உருவாக்குவது அவசியம் என்று அவர் கூறினார். முதலீடுகளை ஈர்ப்பதும் புதிய தொழில்நுட்பங்களைப் பெறுவதும் மட்டும் போதாது என்றும், அவற்றைச் சரியாக இயக்கி மேலும் மேம்படுத்தக்கூடிய பணியாளர்களும் நாட்டிற்கு தேவை என்றும் அவர் தெரிவித்தார்.
2030ஆம் ஆண்டுக்குள் குறைக்கடத்தித் துறையில் 500 பில்லியன் ரிங்கிட் முதலீட்டை இலக்காகக் கொண்டுள்ள மலேசியா, 60,000 உள்ளூர் உயர்திறன் பொறியாளர்களுக்கு பயிற்சி அளித்து அவர்களின் திறன்களை மேம்படுத்தவும் திட்டமிட்டுள்ளதாக அன்வார் தெரிவித்தார். ஷாங்காயில் நடைபெற்ற உலகத் திறன் மாநாடு 2026 தொடர்பான திறன் மேம்பாட்டு நிகழ்வில் உரையாற்றியபோது அவர் இதனைத் தெரிவித்தார்.
தொழில்துறை வளர்ச்சிக்கு தொடர்ச்சியான கற்றலும் திறன் உருவாக்கமும் அவசியம் என்பதை ஷாங்காயின் அனுபவம் எடுத்துக்காட்டுவதாக அன்வார் கூறினார். முன்பு நெசவுத் தொழிலை மையமாகக் கொண்டிருந்த ஷாங்காய், பின்னர் குறைக்கடத்தி மற்றும் செயற்கை நுண்ணறிவு உள்ளிட்ட உயர்தொழில்நுட்பத் துறைகளில் வளர்ச்சி கண்டுள்ளதாக அவர் குறிப்பிட்டார்.
மலேசியாவில் தொழில்நுட்ப மற்றும் தொழில்துறை தேவைகளுடன் பயிற்சி நிறுவனங்களை நெருக்கமாக இணைக்கும் வகையில் தொழில்நுட்ப மற்றும் தொழிற்கல்வி 2.0 திட்டம் செயல்படுத்தப்படுவதாக அவர் கூறினார். எதிர்கால பொருளாதாரத்தை முன்னெடுக்கும் துறைகளில் பயிற்சி நிறுவனங்கள் வேகமாக முன்னேற வேண்டும் என்றும் அவர் வலியுறுத்தினார். தொழில்துறையினர் பயிற்சி முறைகளை உருவாக்குவதில் தொடக்கத்திலிருந்தே பங்குதாரர்களாக இருக்க வேண்டும் என்றும், தொழில்துறையின் மாறும் தேவைகளைவிட முன்னதாகவே பயிற்சிகள் அமைய வேண்டும் என்றும் அன்வார் தெரிவித்தார்.
மேலும், 2013ஆம் ஆண்டு முதல் தொடரும் மலேசியா-சீனா தொழில்நுட்ப மற்றும் தொழிற்கல்வி ஒத்துழைப்பை வலுப்படுத்த வேண்டியதன் அவசியத்தையும் அவர் வலியுறுத்தினார். பசுமைப் பொருளாதாரத்திற்குத் தேவையான பணியாளர்களை உருவாக்குவதுடன், தொழில்நுட்பத் திறன் சான்றிதழ்களுக்கான எல்லைதாண்டிய அங்கீகாரத்தையும் மேம்படுத்த வேண்டும் என்றும் அவர் கூறினார்.
நவீன பொருளாதாரம் சிறப்பாக இயங்குவதற்கு திறமையான தொழில்நுட்ப பணியாளர்கள் அவசியம் என்றும், இயந்திரங்களும் மென்பொருள்களும் மேம்பட்டாலும் அவை எவ்வாறு செயல்படுகின்றன என்பதைப் புரிந்துகொள்ளும் மனிதர்கள் தொடர்ந்து தேவைப்படுவார்கள் என்றும் அன்வார் குறிப்பிட்டார். இதன் மூலம் புதிய வேலைவாய்ப்புகளை உருவாக்கி, தொழில்நுட்ப மாற்றங்களுக்கு ஏற்ப நாட்டின் போட்டித்திறனை உயர்த்துவதுடன், இளைஞர்களுக்கான திறன் பயிற்சிகளையும் மேலும் விரிவுபடுத்த முடியும் என்றும் அவர் தெரிவித்தார். இது மிகவும் முக்கியம் என்றும்.
