கோலாலம்பூர், 4 நவம்பர் : மலேசிய தேசிய பத்திரிகையாளர் மன்றம் (National Press Club Malaysia – NPC), மூன்றாவது முறையாக ‘Jom Jalan with NPC 2026’ எனும் நடைப்போட்டி மற்றும் பொழுதுபோக்கு நடைநிகழ்ச்சியை எதிர்வரும் டிசம்பர் 13ஆம் தேதி கோலாலம்பூரின் புக்கிட் கியாராவில் நடத்தவுள்ளது.
இந்த நிகழ்ச்சியில் 7 கிலோமீட்டர் நடைப்போட்டி மற்றும் 5 கிலோமீட்டர் பொழுதுபோக்கு நடை என இரு முக்கியப் பிரிவுகள் இடம்பெறவுள்ளன.
7 கிலோமீட்டர் போட்டியில் ஆண்கள் மற்றும் பெண்களுக்கான திறந்த பிரிவு, மூத்தோர் பிரிவு, 18 வயதுக்குட்பட்ட ஆண் மற்றும் பெண் பிரிவுகள் இடம்பெறும். 5 கிலோமீட்டர் பொழுதுபோக்கு நடை அனைத்து வயதினருக்கும் திறந்திருக்கும்.
மேலும், 18 வயதுக்குட்பட்டவர்கள் மற்றும் 60 வயதைக் கடந்தவர்களுக்கு பதிவுக் கட்டணத்தில் சிறப்புச் சலுகை வழங்கப்படும்.
NPC தலைவர் டத்தோ அஹிருடின் அட்டான் கூறுகையில், ‘Jom Jalan with NPC’ என்பது மக்களைத் தங்களது நகரம், சமூகத்துடன் மீண்டும் இணைப்பதுடன், நடைப்பயிற்சியின் எளிய மகிழ்ச்சியை அனுபவிக்கச் செய்யும் ஒரு முன்னெடுப்பாகும் என்றார்.
அனைவரையும் உள்ளடக்கிய பங்கேற்பு, ஆரோக்கியமான வாழ்க்கை முறை மற்றும் முதியோர் சுறுசுறுப்பான வாழ்க்கையை ஊக்குவிப்பதும் இந்நிகழ்ச்சியின் முக்கிய நோக்கமாகும் என அவர் தெரிவித்தார்.
பிரதமர் துறையின் கூட்டரசுப் பிரதேசப் பிரிவுடன் இணைந்து நடத்தப்படும் இந்நிகழ்ச்சி, கோலாலம்பூரை நடைப்பயிற்சிக்கு ஏற்ற, பொதுமக்களுக்கு உகந்த நகரமாக மாற்றும் நோக்கத்திற்கும் ஆதரவளிக்கிறது.
மேலும், பசுமையான சூழல் மற்றும் நகர்ப்புற அழகியலைப் பல்வேறு கோணங்களில் ரசிக்கும் வகையில் சிறப்பாகத் திட்டமிடப்பட்ட பாதையில் பங்கேற்பாளர்கள் நடைப்பயணம் மேற்கொள்வார்கள் என்றும் அவர் கூறினார்.
இந்த ஆண்டின் நிகழ்ச்சியின் மூலம் திரட்டப்படும் நிதி, பொருளாதார உதவி தேவைப்படும் ஊடகத் துறையினருக்கு ஆதரவளிக்கும் பத்திரிகையாளர் நல நிதிக்கு (Journalist Welfare Fund) வழங்கப்படும்.
கடந்த 20 ஆண்டுகளுக்கும் மேலாக NPC ஊடகத் துறையினருக்கு உதவி செய்து வருவதாகவும், இதுவரை 100 பத்திரிகையாளர்களுக்கு உதவியுள்ளதாகவும் அஹிருடின் தெரிவித்தார்.
இந்த ஆண்டு நிகழ்ச்சியில் 1,000 பேர் பங்கேற்பார்கள் என எதிர்பார்ப்பதாகவும், குறிப்பாக அதிகமான பத்திரிகையாளர்கள் இதில் கலந்துகொள்ள வேண்டும் என்றும் அவர் விருப்பம் தெரிவித்தார்.
இந்நிகழ்ச்சி பிரதமர் துறையின் கூட்டரசுப் பிரிவு மற்றும் கோலாலம்பூர் மாநகர மன்றத்தின் (DBKL) ஒத்துழைப்புடன் நடைபெறுகிறது.
தேசிய இதயக் கழகம் (IJN), Prince Court Medical Centre, Grab, Destini Berhad மற்றும் Zico Trust உள்ளிட்ட நிறுவனங்களும் இந்நிகழ்ச்சிக்கு ஆதரவு வழங்குகின்றன.
பதிவுக்கு: https://checkpointspot.asia/event/jom-jalan-with-npc-26
மேலதிக தகவல்களுக்கு நிகழ்ச்சி மேலாளர் டோனி கயோண்டாட்டோவை 012-632 0061 என்ற தொலைபேசி எண்ணில் தொடர்புகொள்ளலாம்.
