புக்கிட் மெர்தாஜாம், நவம்பர் 7:பினாங்கு மாநிலத்தின் பெருநிலப் பகுதியில் பெய்த கனமழை காரணமாகப் பல இடங்களில் திடீர் வெள்ளப்பெருக்கு ஏற்பட்டுள்ளது.குறிப்பாக, மத்திய செபராங் பிறை மாவட்டத்திற்கு உட்பட்ட செபராங் ஜெயா, பெர்மாத்தாங் ராவா, தனா லியாட், மெங்குவாங் தித்தி மற்றும் ஜாலான் பாரு ஆகிய பகுதிகள் வெள்ளத்தால் பாதிக்கப்பட்டுள்ளன.
சனிக்கிழமை மாலை சுமார் 4.30 மணியளவில் தொடங்கிய கனமழையைத் தொடர்ந்து வெள்ளப்பெருக்கு ஏற்பட்டதாக மத்திய செபராங் பிறை குடிமைத் தற்காப்புப் படை அதிகாரி கேப்டன் முகமட் ஃபாதில் ஃபஹ்மி ஸைனி தெரிவித்தார்.மாவட்டத்தின் பல பகுதிகளில் கனமழை பெய்ததைத் தொடர்ந்து நிலைமையைக் கண்காணிக்க அதிகாரிகள் குழுக்கள் அனுப்பப்பட்டதாக அவர் கூறினார்.
மேலும், செபராங் ஜெயா பகுதியில் மரங்கள் முறிந்து விழுந்தது மற்றும் வடிகால் தொடர்பான பிரச்சினைகள் குறித்தும் புகார்கள் கிடைத்துள்ளதாகத் தெரிவிக்கப்பட்டது.தற்போது நிலைமை கட்டுப்பாட்டில் இருப்பதாகவும், பொதுமக்களை வெளியேற்ற வேண்டிய அவசியம் ஏற்பட்டால் உடனடியாக உதவுவதற்குத் தங்களது குழுவினர் தயாராக இருப்பதாகவும் அவர் குறிப்பிட்டார்.மேலும், நீர்மட்டம் அதிகரிப்பதைப் பொதுமக்கள் கவனித்தால் உடனடியாக அதிகாரிகளுக்குத் தகவல் தெரிவிக்குமாறும் அவர் கேட்டுக்கொண்டார்.
