கோலாலம்பூர், நவம்பர் 11 – பேராக் மற்றும் சிலாங்கூர் மாநிலங்களில் ஏற்பட்டுள்ள வெள்ளப் பாதிப்புகள் தொடர்ந்து நீடித்து வரும் நிலையில், இரு மாநிலங்களிலும் மொத்தம் 373 குடும்பங்களைச் சேர்ந்த 1,325 பேர் தற்காலிக நிவாரண மையங்களில் தங்கியுள்ளனர்.
இன்று காலை நிலவரப்படி வெளியிடப்பட்ட தகவலின்படி, பேராக்கில் வெள்ளத்தால் பாதிக்கப்பட்டவர்களின் எண்ணிக்கை 380ஆக அதிகரித்துள்ளது. மொத்தம் 108 குடும்பங்களைச் சேர்ந்த இவர்கள் இரண்டு நிவாரண மையங்களில் தங்க வைக்கப்பட்டுள்ளனர்.
ஹிலிர் பேராக் மாவட்டத்தில் உள்ள தெலுக் இந்தான் நகராட்சி மன்ற ஓய்வு இல்ல மண்டபத்தில் 73 குடும்பங்களைச் சேர்ந்த 257 பேர் தங்கியுள்ளனர். அதேவேளையில், லங்காப் நகராட்சி மன்ற மண்டபத்தில் 35 குடும்பங்களைச் சேர்ந்த 123 பேர் தஞ்சமடைந்துள்ளனர்.
இதனிடையே, சிலாங்கூர் மாநிலத்தின் கோலா சிலாங்கூர் மாவட்டத்திலும் வெள்ளப் பாதிப்பு அதிகரித்துள்ளது. அங்குள்ள ஐந்து தற்காலிக நிவாரண மையங்களில் 265 குடும்பங்களைச் சேர்ந்த 945 பேர் தங்கியுள்ளனர். இது நேற்று பதிவான 848 பேருடன் ஒப்பிடுகையில் அதிகரிப்பாகும்.
அதிகமான பாதிக்கப்பட்டவர்களைக் கொண்ட மையமாக எஸ்கே டத்தோ மகாராஜா லேலா பள்ளி விளங்குகிறது. அங்கு 411 பேர் தங்கியுள்ளனர். தொடர்ந்து எஸ்கே பாரிட் மஹாங் பள்ளியில் 238 பேரும், மதப் பள்ளி ரெண்டா அகாமா புக்கிட் குச்சிங்கில் 207 பேரும் தங்கியுள்ளனர்.
மேலும், செக்கோலா அகாமா பத்து 8 ஈஜோக்கில் 77 பேரும், எஸ்கே ஜெயா செத்தியாவில் 12 பேரும் தங்க வைக்கப்பட்டுள்ளனர்.
இவ்விவரங்களை மாநில பேரிடர் மேலாண்மைக் குழு மற்றும் சமூகநலத் துறையின் இன்ஃபோபென்சானா தகவல்கள் உறுதிப்படுத்தியுள்ளன.
